Year: 2024
Type: article
Abstract: შესაძლებელია სხვადასხვა ადგილი მიუჩინოს სურვილს დანაშაულებრივ ქმედებაში დანაშაულის სხვადასხვა მოძღვრებამ და ზოგიერთ ქვეყანაში მის შესაბამისად მიღებულმა კანონმდებლობამ. ასევე განსხვავებულად შეაფასოს მისი მნიშვნელობაც. შეიცვალოს სურვილის ადგილი და როლი დანაშაულის ცნებაში. ყველაფერი სურვილით იწყება. თუ არ არსებობს სურვილი, მაშინ არც მისი შესაბამისი ქმედების ჩადენა ხდება. არ მოხდება ქმედების ჩადენა, არც მისი შეფასების აუცილებლობა იარსებებს. თუ ვამბობთ, რომ თანამედროვე სისხლის სამართალი არის ქმედების სისხლის სამართალი, მაშინ ისიც უნდა დავამატოთ, რომ სისხლის სამართლისათვის მნიშვნელოვანია არა ნებისმიერი ქმედება, არამედ ადამიანის ნებით (სურვილით) წარმართული ქმედება. მხოლოდ ასეთი ქმედება შეიძლება გახდეს სისხლისსამართლებრივი შეფასების საგანი და უარყოფითად შეფასდეს, გაიკიცხოს. ადამიანს ვერ გავკიცხავთ ისეთი ქმედებისათვის, რომელიც მისი ნებით, სურვილით არ ჩაუდენია. მხოლოდ ცოდნაზე ან მხოლოდ სურვილზე დაფუძნებული ქმედება ვერ გამოიწვევს სრულფასოვანი პასუხისმგებლობის საფუძველს. ქმედების ჩადენის დროს უნდა არსებობდეს როგორც მისი ჩადენის სურვილი, ისე მისი გონებრივი გაცნობიერება (ცოდნა). მხოლოდ ასეთი ქმედებისათვის შეიძლება მოვთხოვოთ მის ჩამდენს პასუხისმგებლობა. სათანადო სურვილისა და ცოდნის გარეშე ჩადენილი ქმედება ვერ იქნება სრულფასოვანი ადამიანურ-ფსიქოლოგიური თვალსაზრისით და შესაბამისად ვერც უარყოფით შეფასებას დაიმსახურებს სამართლებრივ-ნორმატიული თვალსაზრისით.
Author: Edisher Phutkaradze
Institution: Sokhumi State University
Language: English
Topic: Criminal Law and Policy
Subfield: Sociology and Political Science
Field: Social Sciences
Domain: Social Sciences
Open Access status: bronze
OpenAlex ID: W4402849546