Year: 2026
Type: article
Abstract: Ge go elwa kanegelo ya Sepedi ka tlhonamo, go lemogwa gore boati bja dithekiniki tša bokgabongwalo di a tšwelela ebile di a kgodiša, ntle fela le phego. Ke fela dikanegelo tša go se tlale legoswi mo polelong tšeo di tšweletšago thekiniki ye ka makgethe. Phego ka boyona ke elemente ye bohlokwa yeo ka yona mongwadi a goketšago mmadi go tšwela pele go bala kanegelo; ke gore, phego ke kgokababadi. Nepo ya taodišwana ye ke go ahlaahla ka tsinkelo ka mokgwa woo Matsepe a dirišitšego bokgoni bja gagwe bja kanego go tšweletša phego pading ya Kgorong ya Mošate (1962). Pading ye Matsepe o thwala moanegwathwadi Boditsi go fega ditetelo tša mmadi. Boditsi o a timelela mathomong a kanegelo, gomme o utollwa mafelelong a kanegelo. Sa go fega mmadi ke gore gobaneng moanegi a timeletša moanegwa yoo a rategago. Se ke sona motheo wa katlego ya phego kanegelong ye. Go latetšwe mokgwanyakišišo wa boleng go dira nyakišišo. Padi e hlaotšwe ka maikemišetšo ka ge diteng tša yona di nepiša sererwa sa nyakišišo ye. Ntlhakemo pampiring ye ke gore Matsepe ke yo mongwe wa bangwadi ba go ikgetha yoo a kilego a diriša phego ka bokgoni bja makgethe mo hisetoring ya dikanegelo tša Sepedi.
Author: James Seanego
Institution: University of Limpopo
Language: English
Subfield: Language and Linguistics
Field: Arts and Humanities
Domain: Social Sciences
Open Access status: hybrid
OpenAlex ID: W7154998711